香港交通網絡未來幾年將迎來一輪重要升級，其中備受關注嘅6號幹線，預計今年實現全線貫通。6號幹線全長約12.5公里，連接西九龍、啟德、九龍灣、觀塘及將軍澳。隨住九龍灣段工程完成，整條幹線將正式打通。對將軍澳居民嚟講，最大改變就係通勤時間。繁忙時段由將軍澳前往油麻地，現時車程可達約65分鐘，新路全面開通後，預計最快約12分鐘即可抵達。除咗私家車之外，巴士路線亦會逐步使用新幹道，來往東九龍、西九龍及其他地區有望更加方便。多項鐵路工程向北延伸，除咗道路工程，香港未來鐵路發展亦集中喺北部都會區同跨境交通。
其中，北環線支線計劃連接新田、河套以及新皇崗口岸；港深西部鐵路則會由洪水橋伸延至深圳前海，未來洪水橋前往前海車程預計約15分鐘。屯馬線亦會增設洪水橋站，配合洪水橋／厦村新發展區。而中鐵線、北環線東延線及新界東北線亦正處於規劃或推進階段，進一步完善新界北鐵路網絡。隨住相關項目逐步落實，香港鐵路未來將進一步接近或連接新皇崗、深圳灣、文錦渡及香園圍等口岸，市民北上選擇亦會增加。
不過，部分鐵路仍然處於規劃階段，實際走線同落成時間仍要視乎後續工程進度。整體而言，香港交通發展正同時向兩個方向推進：市區內縮短跨區通勤時間，北面就加強同深圳及大灣區嘅連接。未來無論返工定北上，出行模式都可能出現明顯改變。
